NYAKANGA

Habayeho umugabo akagira umugore, maze babyarana abana batanu. Bukeye amapfa aratera ibintu biradogera. Hashize iminsi, imvura iragwa, ibintu birakira, imyaka irera, inka zibona ubwatsi zirakira. Bukeye umugabo akajya abwira umugore we ati "Maweya urajye ucunda ubika, ubikire Nyakanga, umunsi yaje tuzabone icyo tumuha, ejo atazatugwira mu rugo".

Umugore aramwumvira akajya acunda abika, maze yuzuza ibibindi bibiri. Nuko haza umugabo wigenderaga ari kumwe n'umwana we. Umugenzi asuhuza bene urugo ati "Muraho yemwe bene urugo?" Umugore ati "Muraho namwe". Umugenzi abaza umugore ati "Umugabo wawe yagiye he?" Umugore ati "Wamushakiraga iki ko yazindutse?" Undi ati "Nari nje kumusura". Umugore ati "Aho si wowe umugabo wanjye yambwiye ko uzatinda ukaza; aho none ntiwaba witwa Nyakanga?" Umugenzi ati "Ni jye". Umugore aramutonganya ati "Kutatubwira umunsi uzaziraho?" Umugenzi ati "Nabuze uwo mbatumaho, ati ariko ntacyo bitwaye, mupfe kumpa icyo mubonye, umushyitsi arya icyo nyir'urugo amuhaye".

Nuko umukobwa muzima abwira umuhungu we ngo najye kumuzanira ikibindi cy'amavuta kiri mu mbere. Umwana akigejeje aho, nyina aramubwira ngo nasubire yo azane n'ikindi kihasigaye. Umwana ajya kukizana na cyo. Umugore ati "Ngayo amahaho nabikiye Nyakanga". Umushyitsi n'umwana we ibibindi babibangira ingata, barikorera barigendera, basiga babwiye umugore bati "Tugiye tutabonanye n'umugabo wawe, icyakora umudutahirize cyane". Umugore arabaherekeza barataha.

Bamaze gutirimuka aho, nyir'urugo aba arahageze. Umugore atangira gutekerereza umugabo we uko umushyitsi yaje, n'uko yamwibwiye, n'uko yamuzimaniye amavuta yose, ko inshuti ye yaje imushaka ntihamusange, none ikaba imaze kugenda, ikaba yamutumye ngo amutashye cyane. Umugabo aramubaza ati "Uwo mushyitsi se yakubwiye ko yitwa nde?" Umugore ati "Ni Nyakanga". Umugabo akubitwa n'inkuba, maze abwira umugore ati "Abagore muri abapfu koko! Ati nakubwiye ko Nyakanga ari igihe kibi cy'inzara, sinakubwiye ko ari umuntu".

Nuko umugabo aramucunaguza cyane, umugore arumirwa, yumvise ukuntu yitiranyije Nyakanga (ukwezi) n'umuntu.

Si jye wahera hahera umugani.